63-тәи Жәларбжьаратәи аџьармыкьа аныҳәатә ҟазшьа аҭаны иаадыртит Шьамтәылатәи Арабтә республика аҳҭнықалақь Дамаск.
Ауснагӡатә рхы аладырхәит Шьамтәыла ахада Аҳмад аш-Шараа, иԥшәмаԥҳәыс Латифа ад-Друби, Шьамтәылатәи Аиҳабыра рхаҭарнакцәа, иара убас аџьармыкьа иалахәу аҳәынҭқаррақәа рделегациақәа рхадацәа.
Аусмҩаԥгатә аҿы Аԥсны ахаҭарнакс дықәгылоит адәныҟатәи аусқәа рминистр Олег Барцыц.
Шьамтәылатәи аԥыза иқәгылараҿы иазгәеиҭеит аџьармыкьа ароль ду шамоу ахәаахәҭра-економикатә еимадарақәа реиҭашьақәыргылараҿы, аинвестициақәа радыԥхьалараҿы, Шьамтәыла арегионалтәи жәларбжьаратәии аекономикатә ҵакырахь архынҳәраҿы.
Ҳазҭоу ашықәс азы аџьармыкьа аҳәаақәа ирҭагӡаны ҷыдала ахшыҩзышьҭра аҭоуп жәларбжьаратәи ахәаахәҭра-економикатәи аинвестициатәи усеицура аҿиара. Аусура раԥхьатәи амшқәа рзы аофициалтә делегациақәеи, анаплакратәи аинвестициатәи еилазаарақәеи рхаҭарнакцәа злахәу аусутә еиԥыларақәеи аиҿцәажәарақәеи мҩаԥысуеит.
