Аԥсны Аҳәынҭқарра Адәныҟатәи аусқәа рминистрра гәалсра дула адырра ҟанаҵоит нанҳәамза 18 рзы 77 шықәса дшырҭагылаз, акыраамҭатәи ичымазара бааԥс ашьҭахь, аԥсҭазаара дшалҵыз Игор Мураҭ-иԥа Ахба – Аԥсны иналукааша аҳәынҭқарратә усзуҩ, адипломат, Урыстәылатәи Афедерациаҟны Аԥсны Аҳәынҭқарра раԥхьатәи Аҷыдалкаатә Зинмчы змоу Ацҳаражәҳәаҩ.

Игор Мураҭ-иԥа диит жәабран 5 1949 шықәса рзы, Аҟәа.

Ломоносов ихьӡ зху Москватәи аҳәынҭқарратә университет азиндырратә ҵара иманы далгеит, анаҩс СССР аҭҵаарадыррақәа Ракадемиа аҳәынҭқарреи азини Ринститут аспирантура далгеит.

Аԥсны Жәлар Рџьынџьтәылатә еибашьраан Игор Мураҭ-иԥа иаԥиҵеит, дагьахагылеит Аԥсны ганрацәала ацхыраара аҭаразы аоперативтә штаб.

2004 шықәсазы Аԥсны адәныҟатәи аусқәа рминистрра дахагылеит.

Идипломатиатә усура адаҟьа ҷыда аурыс-аԥсуа еизыҟазаашьақәа ирыдҳәалоуп. Абҵарамза 14 2008 шықәса рзы Игор Мураҭ-иԥа Урыстәылатәи Афедерациаҿы Аԥсны Аҳәынҭқарра раԥхьатәи Аҷыдалкаатә Зинмчы змоу цҳаражәҳәаҩыс дҟаҵан. Ари амаҵураҿы иара жәаха шықәса инареиҳаны дыҟан, аҳәынҭқаррабжьаратә еинырра аҿиареи аҩ-тәылак рыбжьара аиҩызаратә еимадарақәа рырӷәӷәареи рҿы аџьабаа ду ибеит.

2021 шықәса ԥхынҷкәынмзазы Игор Мураҭ-иԥа евразиатәи аинтеграциа азҵаарақәа рзы Аԥсны адәныҟатәи аусқәа рминистрра ахаҭарнак ҷыдас дҟаҵан.

Аԥсны Аҳәынҭқарра аҿаԥхьа илшамҭақәа рзы Игорь Мураҭ-иԥа Ахба «Ахьӡ-Аԥша» аорденқәа II, III (аҩбатәии ахԥатәии) аҩаӡарақәа ианашьан, «Аԥсны Аҳәынҭқарра адипломатиатә маҵзура Зҽаԥсазтәыз аусзуҩ» ҳәа аҳаҭыртә хьӡы ихҵан. Жәларбжьаратәи аусеицура аҿиараҿы илагалазы иара ианашьан Урыстәылатәи Афедерациа Адәныҟатәи аусқәа рминистрра агәышԥлаҵатә дырга «Жәларбжьаратәи аусеицураҿы илагалазы».

Игор Мураҭ-иԥа ипрофессионализми, шықәсырацәалатәи идипломатиатә ԥышәеи, аԥсадгьыл амаҵ аураҿы ихамегӡареи Игор Мураҭ-иԥа иколлегацәеи дыздыруаз зегьи қәнагала пату рықәырҵоит.

Аԥсны Аҳәынҭқарра Адәныҟатәи аусқәа рминистрра гәалсра дула Игор Мураҭ-иԥа игәакьацәеи иуацәеи ирыдашшылоит.