Нанҳәамза 26, 2026 шықәса рзы Приднестровиатәи Молдавиатәи Ареспубликаҿы Аԥсны Аҳәынҭқарра азинмчы змоу ахаҭарнак Александр Ватамани, Урыстәылатәи Афедерациа аҟынтәи Абжьаҟазаратә мчқәа рырратә контингент арратә еиҳабы аполковник Дмитри Сорокини, Приднестровиатәи Молдавиатәи Ареспубликаҿы Аахыҵ Уаԥстәыла аофициалтә хаҭарнакра аиҳабы Витали Ианковскии х-ганктәи реиԥылара мҩаԥысит.

Аԥсни Аахыҵ Уаԥстәылеи рхьыԥшымра жәларбжьаратәи азхаҵара 18 шықәса ахыҵра иазкыз аиԥылараан Александр Ватамани Витали Ианковскии Дмитри Сорокини Аԥсни Аахыҵ Уаԥстәылеи абжьаҟазаратә миссиа назыгӡаз урыстәылатәи аррамаҵзурауааи арегион аҿы аҭынчреи ашәарҭадареи рыхьчараҿы рлагалазы иҭабуп ҳәа рарҳәеит.

Хазы иазгәаҭан аҭынчреи аҭышәынтәалареи реиқәыршәараҿы Урыстәылатәи Афедерациа иааннакыло аҭыԥи 2008 шықәса нанҳәа 26 рзы Аԥсни Аахыҵ Уаԥстәылеи рхьыԥшымра азхаҵаразы урыстәылатәи анапхгара аӡбамҭақәа рҵаки.

Александр Ватамани Витали Ианковскии урыстәылатәи аган иҭабуп ҳәа рарҳәеит ареспубликақәа ирырҭо адгылареи ахырхарҭақәа жәпакы рҟны реинырреи рзы.

Аполковник Дмитри Сорокин иакәзар аиԥылара алахәылацәа адырра риҭеит Приднестровие иҟоу урыстәылатәи арратә контингент аусуреи ашәарҭадаратә зонаҿы иҟоу аҭагылазаашьеи рзы.

Аиԥылара алахәылацәа арегионалтә шәарҭадареи абжьаҟазаратә усуреи рызҵаарақәа рзы ргәаанагарақәа еибырҳәеит.